love doesn't delight in evil , but rejoices with the truth

بكل الحب هنتكلم عن الحب :D
ما تخافوش مش اسامة منير انا يوكا بس تقريبا الحب شاغل كتير من تفكيري
المهم نخش في موضوع النهاردة
ماشي في امان الله في وسط البلد واحد صاحبي كلمني بيقولي ريكو تعالالي ( انا ريكو برضة مش تستغربوا ) المهم في ايه قالي اهو نقعد مع بعض شوية قلت مش مشكلة
المهم روحتله وبنتمشي عادي وهوا بيتكلم فجأة لقاني سكت
بيقولي مالك قلتله بص وانت تعرف
تتخيله كنت باصص علي ايه ؟؟؟؟؟؟؟؟؟؟؟؟؟؟
اربع شباب بسم الله ما شاء الله زي الفل الواحد فيهم لو عطس جنب الهرم الكبير هيعمل فيه ثقوب تحتاج اربع سنين ترميم
واقفيين ومركزين جدااااااااااااااااً
هاااااااا يا شطار حد هيقولي مركزين في ايه
1- موضوع علمي شيق
2-ندوة (ااه ندوة في الشارع حد عنده اعتراض )
3- بوستر فيلم او شريط جديد ( ااه شباب هايفة عادي )
هــــــــــــــا غلب حماركوا ؟؟
ولا واحدة (شايفك ياللي بتقول عليا غلس )
كانوا واقفين بيتفرجوا علي محل لانجيري (ملابس نوم حريمي ;)
و النظرة اللي في عيون كل واحد فيهم بتوصف هوا بتخيل ايه وايه اللي جواه (حد قليل الادب بقي يقولي كانوا بيفكروا في ايه )
( ايه دا في واحد صدق .... ولد ....عيب في بنات قاعدين )
تصدقوا صعبوا عليا و برضة كنت بقول في سري عمـــــــــار يا مصر معقولة شبابنا وصلوا للدرجة دي ؟؟
اللي شادد تركيزه تمثال خشب لانثي
واللي غاظني شاب فاكر نفسه مقطع السمكة وديلها واقف بيضحك عليهم ويقول اقروا الفاتحة علي الرجالة
بس ارتحت نفسياً لما واحد من الاربعة خرج من تركيزه وقاله كلمة سمعتها كتييييير ( جوزوني وحاسبوني ) رغم ان الكلمة بيقولها من حسرته بس غصب عني ضحكت
المهم ما اطولش عليكوا ( قولوا طــــــــــــــــــــــــــــــول )
ايه الحل ؟؟؟؟؟؟؟؟؟؟؟
نسيبهم يتفرجوا علي التماثيل الخشب ويبقي يوم عيد بالنسبة ليهم لما يكونوا في المحل دا بيغيروا للموديلز دي ( فاهمني طبعاً )
ولا نولع فيهم ولا نسيبهم يغلطوا ولا نعمل ايه ؟؟؟؟؟؟؟؟؟
ولا كالعادة نقول للأهالي بالراحة عليهم وما تزودوش في متطلبات الجواز والكلام اللي زهقنا من كتر ما قلناه ( والاهالي بينفضولنا كالعادة)
بصراحة انا شايف ان الحل صعب
بس اللي انا متأكد منه ان الحب ممكن يحل المشاكل دي
( اه الحب وماحدش يضحك ولا يقول عليا مجنون ولا يقول عليا يوكا العاطفي )
نظرة في عين الانسان أو الانسانة اللي بتحبها بتحسسك بنشوة تنسيك اي غريزة جواك
والله والله والله شوفتها مع شباب كتير من اللي بيقولوا عليهم ( مقطعين السمكة وديلها مع اني مش فاهم ايه علاقة السمكة بالموضوع بس ما علينا )
واحد فيهم قاللي تعرف علي قد ما شفت وعملت في الدنيا البنت اللي بحبها ما فكرتش حتي ابص تحت رقبتها
( اكيد مش قصده ما بصش هيا لابسة ايه ) هوا قصده انه مش بصلها كانثي (مش عشان هيا مش جميلة او حاجة ) بس لانه بيحبها بجد فبيحاافظ عليها حتي من نفسه
وصدقوني دوروا علي الحب ( بس مش اي حب ) الحب اللي بجد ومش بقولكوا كده عشان انزل بكرة الاقي كل شاب ماسكلي وردة وعامل كلاسيك ويقولي بدور علي الحب
لا اقصد اللي يقابل فيكوا حب بجد ( حد يحرك المشاعر الحلوة , المشاعر الانسانية ) يمسك فيه باديه وسنانه ورجليه و يخلي صحابه يمسكوا معاه لو ينفع
هلاقي حد ابن ناس كويس هيقولي الاسلام هوالحل ( مع الاحترام لاخوانا ربنا يكفينا شر.... ولا بلاش )
هقولوه انتا لو حبيت بجد هتلاقي نفسك بتتقي ربنا وتراعيه عشان حاجات كتير
عشان يوفقك في حبك و في حياتك
هتلاقي نفسك مش بتبص علي اي بنت تانية مش لانك بقيت معصوم من الخطأ ولا حاجة بس لانك تخاف يحصل كده للبنت اللي بتحبها او حد يبص عليها دا غير انك اصلا مش هتبقي شايف بنات غيرها في الدنيا
هتصلي تدعي ربنا عشان يساعدك ( ببساطة بقي ليك هدف في الحياة )
دا بالنسبة للدين
و الدنيا بقي هتلاقي الشاب اللي بيحب دا بيحاول يبقي احسن حاجة في الدنيا عشان يشرف حبيبته دي
بس برضه البنات عليهم عامل
اتعلموا ازاي تحبوا وتقفوا جنب اللي بتحبوه
مش عيب انك تقفي قصاد اهلك تقوليلهم انا بحب الانسان دا ( لو متاكده انه بيحبك بجد )
وتقفي جنبه لحد ما توصلوا للي انتوا عايزينه
صدقيني هاتفرحي اووووييييييييييييي بيه ومعاه
هتفرحي بيه انك هاتثبتي لاهلك انك كنتي صح واختارتي انسان كويس وبقي حاجة تشرف بمساعدتك
وهتفرحي معاه لانك بتحبيه وبيحبك
ومش هتصدقوني لو قلتلكوا ان الاهل كمان هيفرحوا لما يعرفوا ان بنتهم عرفت تختار وانهم عرفوا يربوا بنت مستقلة تقتدر تعتمد علي نفسها مش مجرد طفلة بتسمع كلامهم (طب لا قدر الله لو توفوا او حصلهم حاجة ميين اللي هيقولك تعملي ايه )
ببساطة حبــــــــــــــــــــــوا هتبقوا احسن بس الحب الحقيقي اللي بجد اللي يخليكوا احسن
الحب مش مجرد كلمة بتتقال الحب دا فيه اصعب واجمل المعاني في الدنيا
مسئولية و مشاعر - تعب و راحة
فيه حاجات لو فضلت اتكلم فيها لبكره مش هاخلص مش عايز اطول عليكوا اكتر من كده ( عارف ماحدش هيقول طول )
ممكن يكون في حلول تانية ( الله اعلم ) ممكن اكون انا في حالة رومانسية
انما انا بقولكوا حل انا جربته ومش هتصدقوا بس اللي كانوا يعرفوا ريكو كويس ويعرفوه دلوقتي هيقولولكوا الحب غير فيا قد ايه
مع اني بحب بسكوتة صغيرة كلها علي بعضها بتاعت اتنين كيلو ونص ( لا مش للدرجة دي بهزر اكيد )
بس بجد البسكوتة دي غيرت كل حاجة فيا يارب كل واحد فيكوا يلاقي اللي تقدر تغيره و تخليه احسن وما الاقيش حد تاني واقف قدام محلات الانجيري دي تاني ( البنات طبعا عادي من حقهم يقفوا )
وانا هابقي انزل افتش بنفسي :D

اسيبكوا بقي عشان كده كفاية وكمان ايديا وجعتني من الكتابة

لسه قاعد فوق الكرسي مستني ( مش عارف مستني ايه بس مستني )


امضاء
يوكا

أعطيتك حباً لا يقبل جدلاً
أعطيتك قلباً اعتبرك رباً
أعطيتك عقلا لا يخشى احداً
أعطيتك ما ليا في الدنيا ...ولا ابغي عوضاً
أكثيرٌ ما اطلب؟؟
لا أطلب منك إلا ....حباً حباً حباً
لا أبحث عن حب الصبيان أو الحانات
ابحث عن حب لا يرضى بالعقبات
أعرف في قلبك هذا الحب ....يناضل كي لا يدفن كالاموات
فأحبيني او ابتعدي ....فقلبي يأبى الموت في سبات



إلي صاحبة القلب المناضل :
الحب مكانه القلوب وليس القبور
فرجاءً لا تقتلي حباً قد جاء الدنيا علي يديكي
ولا تنكري قلباً أبحر مذ ولد بحثاً عن عينيكي


امضاء

قلب رافض للموت

ليــــــــــــــــــــــــــــــــــــــــــــــــــه ؟؟؟

ليه ما كنتش انا ؟؟ ( استغفر الله العظيم ) بس بجد ليه الكويسين يموتوا واللي زيي يعيش
علي الاقل موتي هايريح الناس

الله يرحمك يا شادي

في الجنة ان شاء الله يا صاحبي .......كان نفسي ابقى معاك بس الله أعلم هبقى فين
رغم اني مش مصدق لحد دلوقتي بس مش لاقي حاجة اقولها غير .................
سامحني لو في يوم اتنرفزت عليك او زعلتك انت عارفني وعارف اني مهما بزعل
او بزعق قلبي طيب ........مش هاقولك غير سامحني .........


امضاء
حزين مذهول

عمـــــــــــــــــــــــــــــــــار يا مصر

بعد مشروع كمبيوتر لكل مواطن
تتفضل حكومة جمهورية مصر العربية بتقديم مشروع
بقرة لكل مواطن

والله مش بهرج يا جماعة انا بتكلم بجد دا الحل الوحيد لمشكلة اللبن
اصل هنعمل ايه حتي اللبن ما بقاش مضمون مش عارف اضحك ولا اعيط بس بجد افتكرت كان في نكتة
قديمة بيقول للريس الشعب مش لاقي عيش يا ريس قالوا خليهم ياكلوا جاتوه
طب دبرنا المرة دي يا ريس الشعب مش لاقي لبن نشرب ايه ؟؟؟؟؟؟؟؟؟؟
هتقولي نشرب بيبسي
النهاردة بجد اتحرق دمي وانا بتفرج علي برنامج العاشرة مساءً
بسم الله ما شاء الله جايبين 3 اساتذة محترمين ( دا اللي انا كنت فاكره قبل ما اكمل البرنامج ) المهم والحمد لله
ما حدش فيهم قال حاجة تبل الريق وتقول للمواطن البسيط يعمل ايه في مشكلة اللبن ؟؟
واحد محترم ( لسه فاكره محترم طيب انا اوي و بصدق المنظر ) المهم قال ايه الشخص دا قال بدل ما تشرب
اولادك مرتين لبن كفاية مرة واحدة وهاتلهم لبن معلب ( عايز اقولوه لفظ اعتراض شعبي بس عييب انا في مدونة محترمة ) فاكر ان المواطن المطحون بيشرب اولاده مرتين لبن في اليوم ما يعرفش ان هيا كباية واحدة الصبح وبتلف علي البيت كله كل واحد شفطة
المهم قلت بلاها الراجل دا ( خلاص عرفت انه عبييط مش محترم )
خلينا مع الاتنيين التانين يمكن حد فيهم يقول حاجة مفيدة وبعد طول انتظار نطق مسئول وزارة الصحة
قلت بقي هيجيب الديب من ديلوه وياريته ما نطق قال ايه اللبن سليم الحمد لله وما فيهوش حاجة والحياة زي الفل
وانه لسه بيشتري لبن الحمد لله واتطمننا علي صحة سعادته وانه لسه ما اتفطمش وقلب الموضوع لدعاية للست حرمه و مدى براعتها في عمايل الزبادي بس نسي حاجة مهمة انه يقول رقم موبايل المدام اهو نبقي ننفعها ونشتري منها الزبادي المضمون المهم ما بلش ريقي شوية غير السيد التالت اللي يعني ( نص محترم )
قال يا جماعة لازم نلاقي طريقة نقول للمواطن عليها يكتشف بيها اللبن المغشوش
قلت الحمد لله هنلاقي حل بس بما اني طيب زيادة عن اللزوم طلعت تسرعت كالعادة لانه لما اتسال طب ايه الطريقة دي ؟؟
فرك مخه بذكاء العلماء النوابغ وشد في شعره كالعباقرة وقال بصوت جهوووووووور
مش عارف
اسم النبي صاينك وحارسك استفدنا ايه كده بقي ان شاء الله
قلت المشكلة اللي احنا عارفيينها ومش عارف الحل ؟؟؟
زغرط يا شعب و هيص يا مواطن الحكومة هتخليك تشرب لبن معلب و معقم
مش علي حسابهم طبعاً ( انت عبيط ولا ايه يا عم هوا في حاجة علي حساب الحكومة ) علي حسابك طبعا و معلش حاول تتنازل عن كباية اللبن التانيه
واللي بيشرب لبن مرة واحدة دا ابن 60X70 مش لازم يشرب اصلاً
وبالنسبة للاطفال مش شرط بتفطموا باللبن مالها مية الفول كويسة وزي الفل اما بالنسبة للمقتدرين
فالحكومة تقدم احد الحلين
1) بقرة او جاموسة لكل مواطن ( زي ما انت تحب شوفت الحرية )
2) تجيب لبن معلب ( وانت حاطط جزمة في بقك ) و تنفع شركات اللبن اللي الريس او ابنه ( ربنا يخليه لينا ) هايشارك فييها قريب ان ما كانش مشارك فيها اصلاً ( لسه ما اعرفش الموضوع دا بس هاطقس واقولكوا )
وربنا يخليلنا الريس وشركات الالبان المعلبة المضمونة ومية القول المتينة اللي هنفطم عليها الغلابة بعد كده
ويجعله عامر

انا عن نفسي هاستغني عن اللبن واشرب ميرندا ( خلاص بقي عدينا الفقر ) او فودكا ( اهو اعمل دماغ )
الصورة دي اقل رد علي اللي بيحصل فيينا حتي اللبن
امضاء
ريكو باشا

ايه اللي هالة سرحان بتعمله دا يا جماعة !!!!!!!!!!!!!!!!!!!!!!!!!!!
هيا بتهرج ولا ايه هيا كده بتخدع مين ؟؟ بتخدعنا ولا بتخدع مين بالظبط
كان ممكن تعمل البرنامج و توضح وجهة نظرها من غير ما تجيب بنات و تعمل افلام و حوارات
هيا كده ضيعت مصداقية برنامجها
وشوف البجاحة يا اخي ........ كانت فرحانة اوي بالبرنامج وانها الوحيدة اللي هتجيب داعرات وتطلعهم في البرنامج قال يعني دي حاجة تفرح !!!!! تقريبا كانت عايزة تاخد لقب مقنعة الداعرات الاولي في مصر
بس معلش سؤال صغير كده هيا مدي اقناعها ليهم قد ايه ؟؟؟؟؟؟؟؟؟؟؟ يعني لحد الظهور علي الهوا بس ولا اكتر شوية ;)
يا ريت بعد كده يا مدام , يا دكتورة هالة لما تحبي تعملي برنامج ما تضحكيش علينا وتجيبي الحقيقة ومش عيب انك ما قدرتيش تلاقي داعرات حقيقيلت يظهروا في البرنامج
مش لاننا بلد خالي من الدعارة لا سمح الله ........... بس لان مش معقول واحدة هتتطلع تقول علي نفسها كده حتي لو هيا فعلاً كده
احنا رغم مظاهر الامركة مازلنا مجتمع شرقي يا دكتورة

حنين للقبر
. أشعر بالوحدة.... تقتلني وأحس الموت....يحوطني
. عمري بالكامل أعوام واليأس يخيم في وطنـي
. جربت الحب...ولم انجح قلبي المفطور يأنبنــي
. جربت الضحك...ولم أفلح و الهم الدائم صادقنـي
. لم أنجح.... إلا في الفشل خطأ من خطأ يأخذنــي
. عقلي امتنع عن العمل أبحث عن شئٍ يسعدنـي
لكني... لا أريد حباً....لا أريد فرحاً.....جل ما أريد....ملكٌ للقبر يسلمنـي





لم اندم علي فراقك ولكن الندم كل الندم.............علي لقيا كي

صحيت النهاردة الصبح طاقة في دماغي اقرا في كتاب الشعر الحلمنتيشي ولقيت نفسي بكتب حاجات غريبة فا حبيت اخد رايكوا فييها اللي عاجبوا يقولواللي مش عاجبوا ياريت بلاش احراج وربنا ما يحرمكوش مني اول خاطر اسمه لو بتحبيني

لو بتحبيني قوليها وماتستنيش بعديه
لا كلام وملام من حد
ما تخبيش احساسك ليا كوني لقلبي شعاع يتمد
قولي و خلي الناس تسمعها وما تخليش لمشاعرك حد
عمر الحب ما كان يتعيب ولا كان يوم دمعة علي الخد
لو قولتيها راح انسي الدنيا وافتح اي طريق اتسد
عايز اعيش وياكي ف بيت لكن غير قابل للهد
بس ان كان دا مجرد حلم واللي اتبني جوايا دا وهم
هابعد مش هابقي علي الوعد
وهادمر صورتك جوايا وامشي واقولها خلاص انسيني
ومش هاستني حتي الرد

=================================
تاني واحد اسمه مبدأ سادي




عايز اكسر كل الدنيا وادمر كل العقبات
واغير مبدا كان سادي كل اللي بيتقال فييه هات
تدفع كام بعدين راح تاخد انسي يا عم بقي الشعارات
ماتصدعش دماغنا وقول تملك كام مليون دولارات
اما ان كنت النوع التاني اللي يعيش و يموت في ثواني
لو وريته جوزين جنيهات
شد رحالك وابعد عني لاعمل في خدودك متاهات

==================================
انا عارف اني طولت عليكوا و صدعتكوا بس دا من عشمي فيكوا

امضاء
ريكو باشا

قالك اللي يعيش ياما يشوف واللي يلف يشوف اكتر

بلدنا دي فيها حاجات كتير تضحك والله العظيم بجد ام الدنيا ولو مش مصدقني اقروا واحكموا اليومين دول انا مخنوق من البيت فبنزل الف كتير اوي وفي مرة من جولاتي وصولاتي افاجأ قال ايه مدرسة مكتوب عليها بالبنط العريض المدرسة تسنخدم اريالاااه والله العظيم مكتوب كده وبخط اسود عريض بصراحة انا لما قريت كده كنت هاموت علي روحيمن الضحك بس بعديها بشوية بقيت مستغرب و بسأل نفسي طب المدرسة بتستخدم اريال في ايه يا تري عشان تغسل عقول اولياء الامور و تقنعهم ان اولادهم بيتعلموا تعليم صح و بجد ولا عشان تقنع الطلبة ان هما في مدرسة بجد وان دا مجهود فظيع بذلته الدولة وان دي احسن الامكانيات المتاحة علي مستوي العالم وان الطفل المصري زييه زي اي طفل في العالم ولا لالالالا استغفر الله العظيم انا ظلمت المدرسة اكييد هما بيستخدموا اريال في الحفاظ علي نظافة جيوب اولياء الامور وفي نفس الوقت علي عقول الطلبة نظيفة بعد كل سنة دراسية مش عارف والله بس بجد اللي يعيش ياما يشوف بس اللي يعيش في مصر يشوف اكتر
امضاء
ريكو باشا

قال ايه يقولك تسهيلات للمواطنين هاهاهاهاه
من كام يوم كده صحيت من النوم عادي زيي زي اي بني ادم طبيعي ( ايوه طبيعي مش عايز حد يتريئ)المهم خلينا في الموضوع ببص في رخصة العربية لقيتها انتهت و المفروض اني كمواطن كويس و بحب الريس ( اه بحبه ) حد يقدر يقول غير كده قولت اجدد الرخصة فبكلم والدي بقوله يا حاج انا عايز اجدد الرخصة بتاعت العربية قالي خلاص سيبهالي و يومين كده و اخلي حد يجددهالك عشان انا مش فاضي اليومين دول فبصراحة انا ما كنتش عايز اسيبله العربية فقولتله لا يا حاج خلاص هاروح اجددها انا ( فالح انا اوي اصلي ) قالي يا ابني هاتتخنق و هتزهق سيبهالي احسن قولتله لا يا حاج احنا رجالة برضة ولا ايه ( ابو علي يا اخواتي ) ولبست هدومي وروحت المرور لقيته فاضي والحمد لله قولت كويس اني نزلت بدري الحق اخلص قبل الزحمة (بحلم انا صح ؟؟) جبت الورق والنموذج مش عارف رقم كام وطلب مش فاكر ايه وروحت الشباك اقدم الورق بصراحة الموظف قابلني كويس و بيضحك و كده ( ما لسه الزحمة ما جتش ) المهم قالي تمام تمام ( انا فرحت بقي ) قالي بس ناقص دمغة مش عارف بتاعت ايه كده عشان نحطها ع الطلب الأولاني اللي انا مش فاكره برضة المهم رحت جبتهالوا وانا بضحك بقي خلاص خلصت قالي كويس هاتلنا بقي طابعين شرطة عشان نحطها ع النموذج قولتله ما انت قولتلي فاضل الدمغة الأولانية بس قالي معلش جل من لا يسهو قولت مش مشكلة بسيطة ورجعتلوا تاني قالي هاتلي بقي دمغة انشاءات هي هي هي هي ( انا بعيط ) يا عم ما نت قولتلي خلاص قالي خلاص هانت ( قولت ف عقل بالي يا وااااد طنش خالص ) وروح هات اللي هوا عايزه كويس ان الدنيا رايقة ورجعتلوا ووداني ورجعتلوا ووداني فضلنا علي كده كتير حوالي 3 ساعات والدنيا لسة رايقة ( لا طبعا كانت الناس جت ) وكل شوية اروح اجيبله اللي يطلبه و ارجع اقف في الطابور من الأول تاني عشان اوصله يبعتني اجيب حاجة تانية و هكذا و هكذا لحد ما الحمدلله خاصت ع الساعة اتنين الضهر بعد نا اكتشفت حاجات كتير
1- ان الدولة بتسعي لمصلحة المواطن ( اللي هوا انه يخس و يحافظ علي لياقته البدنية )
2- الدولة بتقرب المواطنين من بعض (لدرجة اني لسة فاكر ريحة عرق الراجل اللي كان واقف قدامي في الطابور ( ايه القرف اللي انا بقولوه ده )
3- ان كل ورقة في بلدنا لازم يتحط عليها 3000 دمغة مش للضرورة ولا للتسهيل بس لأن عندنا حوالي 300000000000 مليون دمغة ومش هانرميهم يعني ولا هوا افترا فلازم نبيعهم للشعب
4- اني اسمع كلام ابويا كويس جدا و ابطل فذلكة ايه يعني لو قعدت من غير العربية يوم ولا اتنين هوا انا مولود بعربية يعني
وافتكر الأستاذ الكبيير البسيط العظيم صلاح جاهين لما وصف الأستاذ اللي كان واقف في الشباك ودوخني
السيد عبد العاطي البيروقراطي
السيد عبد العاطي البيروقراطي من بيروقراط مركز مش فاكر ايه
كل بلدهم بهوات سبحان العاطي الكاتب بيه ومدير المصلحة بيه
والسيد عبد العاطي البيروقراطي راجل دوغري ,فاهم ايه اللي عليه
راجل يعرف امتي ينخنخ و امتي يطاطي وكمان يعرف انتي يدلدل رجليه
بيجي المكتب بمواعيد ظباطي والساعة اتنين ولا ورقة تكون ف ايديه
فنان في الشغل , وفنه ارستقراطي الفن فقط للفن بتدحكوا ليه ؟؟
لاتقوللي مصالح شعب ولا كلام واطي الهدف السامي علاوة 3 جنيه
والسيد عبد العاطي البيروقراطي السد العالي ف نظره اسمه ... دوسيه

امضاء
ريكو باشا

ارحموا بوليس قوم ذل


والله العظييم يا شباب البوليس اليومين دول بيصعب عليا يا عيني زمان البولييس كده كان ليه شنة و رنة كان يقوللك دا جوزها عسكري في البولييس مش حتي ظابط لأ عسكرس بس كان ليه هيبة إنما دلوقتي يا عييني غلابة مكاسيير الجناح واخديين جنب أنا أقصد الشرطة العادية اللي هما بتوع ( الشرطة والشعب في خدمة الحاكم يوو أصدي الشعب ) مش حبايبنا الحلوين اللي عقبالهم كده لما يبفوا مكاسيير الجناح ( تفتكروا ممكن ؟)يارب
المهم كان ومان الشرطة دي حاجة جامدة يعني يعملوا الكميين من دول يقفلوا شوارع إنما دلوقتي يعملوا الكميين ما يخوفوش حتي العيال الصغيرة الظاهر ما بقوش يخافوا !!!
وتخيلوا !!!!!!! شوفت تلات شبان واقفيين بيتسلوا طبعا ُ ها تفتكروا بلب أو بسيجارتين يا عم لأ انتوا عارفيين بيتسلوا بإيه بيحدفوا ظلط و حصي علي البوكس و تخيلوا اللي ضحكني أكتر إن البوكس كان بيجري منهم
تقريبا ُ كده الشباب دي أعلنت الإنتفاضة علي البولييس
بس و الله الشباب دي كده غلابة شفت اللي أعجب من كده
عربية بولييس فيها ظابط محترم ( معلش عدو محترم دي) و تلات أمناء شرطة نازلين يفتشوا شابين اشتبهوا فيهم في الشارع بس لجل حظ البولييس الأسود إن الشابين دول مزاجهم ماكانش رايئ المهم مسكوا الظابط والأمناء اللي معاهم رنزهم العلقة التمام من اللي قلبك يحبها ( لعدوك ) وقام الظابط يلملم الأمنا بتوعه من ع الأرض ويلملم معلهم خيبته ومنظره اللي راحوا في التراب وركبوا العربية وجري يستخبوا في الوكر قصدي في القسم
و في يوم من أيام مدينة نصر الهادئة جدا ُ قرر الظابط اللأنتقام و الثأر لكرامته اللي اتبعزقت
لم الجيش من ع القهوة ولبسهم لبس الخناقات وجهزهم ب الأسلحة من سنج و مطاوي ودربهم علي إستخدامهم بمهارة فائقة و بعدين وضع الخطة وأعلن الهجوووووووووووووم
وتمت العملية بنجاح وقبضوا علي ( أسامة بن لادن و أيمن الظواهري) يووووووه لأ قبضوا علي الشابين اللي روأوووهم و خدوهم علي المغارة ( يووووو تاني ) قصدي القسم يا جماعة و كانوا خلاص هايبتدوا الإحتفال بالنصر العظييم حتي عكنن عليهم والد أحد الشابين اللي طلع إنه لواء في الشرطة وطبعاُ خرج الشاب مع بابيه ( والده ) وخد معاه صاحبه الأنتيم حتي قبل ما يجربوا الكرم الميري ( ربنا ما يكتبوا علينا )واللي جنني أكتر و أكتر إم الظابط إعتذر للشابين علي إساءة المعاملة ( واللي ما يعرفك يجهلك يا باشا )
مش عارف أقول إيه ؟؟
(اللي ليه ضهر ما يتضربش علي بطنه ) ولا ( ارحموا بولييس قوم ذل ) انا شايف إرحموا بولييس قوم ذل
انتوا رأيكوا إيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
إمضاء
ريكو باشا

اختلاف الأجيال

بصراحة يا جماعة أنا مستغرب هو صحيح بيكون في تغير في المفاهييم الإجتماعية بين الأجيال مع مرور الزمن بس مش للدرجة دي يعني زمان كان الشاب الكويس اللي الشباب تحب تتعرف عليه و تصاحبه و تقرب منه هو الشاب المؤدب المحترم اللي مش بيغلط اللي بيسمع كلام أهله (بابا , ماما , أخواته الكبار ) و أنا وأنت
اللي مش بيعرف بنات ( عشان تأمنه علي أخواتك البنات لو عندك ) اللي مش بيشرب سجايير عشان يساعدك تحافظ علي صحتك بإختصار الشاب المؤدب المتربي
وكان الناس تخاف علي ولادها من الشاب الصايع عشان ما يبوظش ولادهم و يفسد أخلاقهم
تعالوا بقي نشوف دلوقتي ميين الشاب اللي الشباب هتقرب منه و تصاحبه علي العكس تماماًَ أصبح الشاب ( الكووول ) يعني اللي مقطع السمكة وديلها الشاب اللي ليه تجارب في كل حاجة الوحش منها قبل الحلو اللي هو
1/الشاب اللي بيشرب سجايير و غيره ( وما أدراك ما غيره !!! ) عشان يبقي لذيذ ودمه خفيف كده ويطري القاعدة
2/ الشاب اللي بيعرف بنات بعدد شعر راسه و يا ريت ما يكونش يعرفهم بس يكون أزيد من المعرفة بشوية (كتييييييييييييييييييييير) فاهمنني طبعاُ أهو بينفع وقت زنقة ( وما أكتر زنقات الشباب اليومين دول ) وبصراحة أنا عاذرهم لأني شاب و بحس زيهم من اللي بشوفوه في الشارع والمراقص ( الديسكو تيكس ) بس جامدة المراقص دي صح
البنات بعييد عنا وعن السامعيين ( أقصد القارئيين) وطبعاُ ما أقصدش البنات كلهم لأن طبعا ُ في بنات محترمة جدا ُ جدا ُ المهم البنات اللي أنا أقصدهم باظوا ى بقي في حياء ولا كسوف ولا اي حاجة خالص ولا أي كلام من بتاع زمان دا ( اللي هوا البنت من دول كانت تحمر و تصفر لو ولد بصلها ) إنما دلوقتي البنت تبصلها تقوللك فكك من التسبيل دا ما يكولش معايا ( دا لو انتا مش عاجبها ) أو تيجي تطلب رقم موبايلك ( يبقي اكييد انتا عاجبها ) يا بختك يا عم ما علينا نرجع لموضوعنا عشان انا حاسس ان انتوا زهقتوا مني
3/ الشاب اللي بيعرف يتخانق اللي قلبه مييت ( أهو حماية برضه ) أصلي بقت ضرورية أوي اليومين دول
ويا ريت لو كان الشاب بعد كل ده معاه ركوبة ( عربية أو موتوسيكل ) بس مش أي عربية لازم تكون حديثة ومتروشة ( فيها صب ووفـر يطرشك وانت جو العربية ) وجنوط ويا ريت تكون العربية من برة مليانة بوسترز ( صور روشة يعني ) عشان متعرفش لوون العربية أصلا ُ ( بتنفع في المرور ) ولو موتوسيكل لازم يكون (راييس) (900 , 1100) سي سي أو غلي الأقل 400 سي سي فايير بلاد ولازم يكون ماركة جامدة ( ياماها ) أو ( سوزوكي ) علي الأقل
والشاب دا مش بس الشباب بس اللي تحب تعرفه وتتباهي بمعرفته لأ دا البنات كمان و (تتمنظر بيه ) علي أصحابها وممكن تتنازل معاه عن جزء كبيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييير من كرامتها
وحاجات تانيية ( ربنا يستر علي أخواتنا و أخواتهم )
بس يا عم .
حد جدع بقي يسألني و يقوللي طب الشاب المحترم المؤدب إبن الناس الكويسيين ( و محدش يفهمني غلط في إبن الناس الكويسيين دي أحسن بقت شتيمة بين الشباب اليومين دوول )
أقوللك أصبح نكرة ومكرووه وشاب معقد محدش يحب يقعد معاه أو يصاحبه غيير يا حراام المؤدبيين زيه و الشباب التانيين ينكروا معرفتهم بيه إلا إذا كان فييه مصلحة من ورااه
و البنات تحتقروا وتقوللك دا زي البنات و بيتكسف و لخمة مش كوول كده بس ممكن يفتكرووه لو واحد من الشباب الكوول ضحك عليها ( ما أقصدش قال عليها نكت ) أكييد انتوا فاهمنني وقتها يفتكروا الشاب المؤدب
مش عشان هوا كويس لأ عشان هوا العبييط اللي ممكن يتدبس و يتجوزها
دا ختي الأهل بقوا يحبوا ان ولادهم يصاحبوا الشاب ( المدردح ) عشان ولادهم ما يبقوش لخمة
أنا حاسس ان انا طولت عليكم أوي كده بس خلاص هاسكت قبل ما حد يقوللي اسكت يا إبن الناس الكويسيين بس ليا سؤال
يا تري إيه اللي هيحصل بعد كده هنبقي مجتمع غربي معدوم التقالييد والعادات وتصبح مبادئنا الأساسية هي ( الجنس , المال , المصالح ) ؟
يا ريت حد يرد عليا
ملحوظة :: احب ان اعتذر لكل الشباب و البنات المحترميين واحب اعرفكم ان دي مش آراءي انا الشخصية و يا ريت ما يعتبروش كلامي إساءة ليهم من أي توع وشكرا ً وربنا يخليكوا و تحافظوا علي مبادئ و قييم هذا المجتمع الآيل للسقوط
إمضاء
ريكو باشا

ياااااااااااااااااااا لهوووييييييييييييييييييي
ايه ده انا متأكد ان كلو دلوقتي بينزل يجيب لبس جديد للعيد و كده بس انا نفسي اسأل الي نزلوا وسط البلد عرفوا يجيبوا حاجة بلاش دي عرفوا يمشوا طب !!!!!!!!!!!!!!!!!!!!!! انا عن نفسي ما عرفتش حتي اتنفس
بس هانقول إيه هي دي القاهرة ولياليها الجامدة انا ما انكرش ان انا من عشاق ليل القاهرة بس بالطريقة دي صعب
اللي انا شوفتوا النهارده ما يحصلش غير في مكان علي وجه البسيطة (حلوة البسيطة دي ) وهو الحج مع الأعتذار طبعاَ للفرق الشاسع بين ما يطلبه رواد كل من المكانين فرواد (حجاج) بيت الله يريدون العفو و الغفران اما رواد وسط البلد فيبحثون عن..........إيه يا تري (وياريت ما حدش يقولي العفو و المغفرة هماكمان
اقولك انا بيدوروا علي ايه ولا بلاش ربنا ستار علي عبيدو بس بجد يا جماعة لو نص شبابنا بيهتم بالعلم او الدين كنا بقينا من الأمم اللي بيسموها متقدمة بس هأقول ايه نصيب بقا علي العموم ربنا يعدلها و معلش سلااااااااااااااااااااااااااااااااااااااااااااااااااااام بقا عشان انا اليومين دول بنام بدري تصبحوا علي خيييييييييييير

انا مش عارف اكتب ايه بصراحة يا جماعة دي اول محاولة ليا في مشوار التدوينات الشخصية
بس انا بجد مبسوط اوي اني خدت الخطوة و ابتديت اكتب و احب اشكر الإنسان اللي ليه الفضل اني احب التدوين ة بصراحة انا بقالي فترة طويلة متردد اكتب ما اكتبش لالا خلاص هاكتب والنهارده قررت اني اكتب و رزقي علي الله بس كان لازم اقول شكراَ للإنسان دا اللي عرفني يعني ايه مدونة ويعني ايه انك تكتب كل اللي جواك من غير ما تخاف ولا تفكر مين هايقرا ولا مين مش هايقراه اكيد طبعاَ اللي بيقرا زهق و بيدور علي حاجة يرميني بيها بس الحمد لله انا قاعد بعيد
يجي واحد تاني يقول هما عايزين يضربوك ليه ؟ أقوله اصلي انا بقالي ساعة عمال اقول اشكر و اللي حببني واللي نقطني وبرضه ما قولتش اسمه ايه
خلاص يا جماعة ما حدش يغلط هأقول اسمه .........يا سيدي اسمه
محمود صابر
الشهيير بالكونت دي مونت حرنكش
وبجد احب اقول ان الإنسان دا من الناس اللس بجد انا بحترم عقلها وبقدر رأيها جداَ و 1000 1000 شكر ليك يا حرنكش وبس كفاية كلام عليك أوي لحد كده