شطبنا اسف يا جماعة ما فيش بلوج هنا تاني
لان المتشرد اللي كان بيكتب هنا في طريقه للموت
ابقوا اقروله الفاتحة
سلام

علي فين يا ريس ؟؟؟؟؟

صباح الخير للي لسه صاحي من النوم و مساء الخير للي لسه ما نامش زيي
المهم من فترة كده كنت بتفرج علي الجرنال زي زي اي مواطن مصري
المهم قريت خبر جامد اخر حاجة تخيلوا الخبر ايه ؟؟؟؟؟

اريحكوا انا و اقولكوا
الخبرا بتوعنا بعد فحص و تدقيق اكتشفوا حاجة فظيعة
قال ايه ان مصر عاجزة عن تصنيع الابرة مش ابرة معجزة ولا حاجة ولا حتي ابرة الدوا دي
لالالالالا احنا عاجزين عن تصنيع الابرة بتاعت الخياطة دي العادية اللي هوا الراجل بيطلع الاتوبيس
يبيع الحبة منها بجنيه
تخيلوا عاجزين عن تصنيع الابرة يالهويييييييييييييييييييييييييييييييييييييييييييييييييييييييييييييييييييييييي
المهم قلت يا واد طنش خالـــــــــــــــــص و ما حتطش في بالي قلت عشان ما اتعقدش و اتخنق
بس اجي اذاكر (ايوه بذاكر و مجتهد كمان حد عنده مانع ) المهم بذاكر عن الحرب البيولوجية
دا اصلا تخصصي المهم الكلام عادي و مقنع و ما كانش في حاجة غريبة
لحد ما وصلت للدول المشتبه في حيازتها للاسلحة البيولوجية تخيلوا الاقوا مين
كله هايقول امريكا , كوريا , اليابان, روسيا ..... هاقوله هـــــــــــأ عادي و عارفين
انما المفاجأة لقيت ( مصر , السودان ) تخيلوا مصر و السودان فيهم اسلحة بيولوجية
مصر اللي عاجزة عن تصنيع الابرة هاتصنع سلاح بيولوجي ( وقال انا كنت فاكر اني انا الامل اني اعمل اول سلاح بيولوجي في مصر ) اتاري مصر فيها اسلحة بيولوجية وانا مش عارف
شوف حكمة ربنا يا مسلم شوف حكمة ربنا (علي راي سعيد صالح)
بلد مش عارفة تعمل إبرة خياطة معفنة هتعمل سلاح بيولوجي بيدمر بلاد في ثواني (ا جم من اعفن سلاح بيولوجي يدمر حوالي ا كم مربع في ثانية ) يعني اتطمنوا يا شباب احنا محمين و معانا اسلحة بيولوجية
بس معلش بقي ما معناش إبرة خياطة نخيط بيها ( معلش بقي نبقي نستورد إبر او نودي هدومنا تتخيط برة و ترجع او بما اننا بلد فيها اسلحة بيولوجية يبقي احنا بلد غني بقي بلا خياطة بلا بتاع اللي يتقطع يترمي ويتجاب غيره جديد ) بقولك عندنا سلاح بيولوجي طب ماشي هاقول يمكن وله في خلقه شئون والحكومة بتاعتنا ناصحة ومخبية عشان الامريكان ما يعملوش فينا زي العراق ( بعد الشر طبعا علينا وعلي الريس لا يعملوا فيه زي صدام ) او دكتور المادة بيجامل الحكومة علي قفانا برضه مش مشكلة
انما السودان دي فيها سلاح بيولوجي ازااااااااااااااااااااااااااااي حد يقنعني
بلد مش لاقية تاكل و لا لاقية تلبس الشعب ملابس داخلية حتي هيعملوا سلاح بيولوجي
ولا الدكتور سوداني ( مش اللي بيتاكل ) الجنسية و بيجامل برضه حكومته علي قفانا ( والله قفانا تعب )
طب سيبنا من الدكتور ممكن لا مصري و لا سوداني و بيهيس مش مشكلة سيبنا منه خالص يا عم مش هذاكر وهافتح التلفزيون اتفرج علي اي حاجة ( ابقي فاشل احسن ما ابقي مجنون )
المهم فتحت التلفزيون و يا ريتني ما فتحته الاقي المذيع بكل فخر بيعلن
عن ايه كده حد ناصح يقولي ( افتتاح مصنع جديد يصنعلنا ابر .... عشان اقوله انت غبي مش قولنا مستحيل تصنيع الابرة في مصر ) امال بيعلن عن ايه بكل فخر كده
بيعلن ( اسم النبي حارسه و صاينه ) اننا بقينا بنافس الفلبين و صدرنا ( بسم الله ما شاء الله و خمسه و خميسة في عين اللي يسمع الرقم وما يصليش علي النبي ) صدرنا ايه يا اخويا انطق
صدرنا 120الف (ابرة ؟؟؟ يووووو انتي غبي ليه يا ابني و مصمم مش قولتلك ما عندناش ابر .. روح اشتري من بره ) صدرنا والحمد لله 120 الف خدامة للبلاد العربية ( بالعربي بقينا بنصدر جواري للعرب )
شوف يا اخي بسم الله ما شاء الله الرقم يفرح القلب كده بس لو كان اي حاجة غير خدامات
يعني 120 الف مهندس , دكتور , انشا الله لعيبة كورة انما خدامين
للدرجة دي بقينا خدامين وجواري عند العرب
و الظاهر ان رجالتنا ما بقالهومش لازمة مش عايزين غير حريمنا بس طب المرة دي خدوهم خدامات و جواري
المرة الجاية هنصدرلهم ايه ...... ( بنات ليل ؟؟؟ ) ربنا يستر علي حبيبتي و اختي وامي
انا اموت قبل ما واحدة فيهم تزعل او تضايق... مش كرامتها تتذل
بس انا ماشي يا عم هاعرف اخلي بالي منهم انما بقيت الشعب يا تري كل شاب هيقدر يخلي باله برضه من الناس الغالين عليه ؟؟
يارب يا شباب
وفي سؤال واحد للريس ( اللي شكلي هابلغ عنه واقول ان عنده اسلحة بيولوجية عشان اشوفه زي صدام كده عن قريب ) قولوا امين
علي فين يا ريس ؟؟؟؟
واخد البلد دي علي فين ؟؟؟؟؟ بقينا علي ايدك و الحمد لله مجرمين و عاطلين عن العمل و اخيرا جواري فاضل ايه تاني
مش عارف أقول ايه غير
الله يرحمك يا عبد الناصـــــــــــــــــــــــــر

دا حرنكش يتاكل اكل مش كده :D

مصر المعمورة بالفنانيــــــــــــــــن

عارف اسم البوست غريب النهارده بس دا بسبب مش كده و خلاص


تتشرف مجموعة وان شوت السينمائية بدعوة جميع القارئين و السامعين و الموجودين واللي مش موجودين وانا وانت و رقصني يا جدع

لالا خلاص هابطل تهريج
بس بجد تتشرف جمعية وان شوت السينمائية ( تحت اشراف / صديقي اللدود حرنكش بن ممدود ) بدعوة كل من يهمه الامر لحضور الحفل السينمائي ( المش عارف كام ليها )
و سيتضمن الحفل
1) فرقة موسيقية (روك باند)
2) فيلم ( تنهيدة) فكرة و اخراج برضه صديقي اللدود (حرنكش الشهير ب محمود صابر :d )
وذللك يوم 28/6/2007 القادم
وسيشرف الحفل بالحضور ناس كتيــــــــــــــــــــــــــــــــر مع احتمال حضور الوزير المثقف ( وما حدش يدقق علي المثقف دي اوي , بس لازم نجامله لحد ما يجي ) الاستاذ الدكتور / فاروق حسني
وكل من يهمه الامر برجاء ابلاغي برغبته عشان اعمل حسابه في الدعاوي
وسيكون ذللك في نقابة الصحفيين الدور الاول قاعة العرض الرئيسية
وما نجيلكوش في فيلم ساقط
بس بجد يا جماعة انا شوفت الفيلم (كوسة بقي مش انا صديق المخرج ) بجد فيلم جامد اخر حاجة و يستاهل المشاهدة ( ومش بقول كده عشان هو صاحبي ) ( يعني مش بنظام مين يشهد للعروسة ) بس بجد الفيلم حلو اوي
وكمان الفرقة اللي جاية جامدة كيييييييييييييييييييييييييييييييييييييييييييييك بس
و يا ريت اشوفكوا كلكوا هناك انا عن نفسي هاكون اول الموجودين (ان شاء الله علي راي حبيبتي ) لو فضلت عايش لحد يوم 28/6/2007

مش عارف اكتب و لا اكتب اقول ايه بس حاسس اني عايز اكتب أي حاجة و معلش استحملوني بقي
عارف اني بقالي فترة مش بكتب أي حاجة مش هاتلكك و اقول الامتحانات انتوا عارفيني :D
بس ما كنتش حاسس اني ليا نفس اكتب أي حاجة بس لما تحس انك لوحدك وانت وسط الناس لان الانسان الوحيد اللي بينسيك وحدتك مش معاك يبقي لازم تكتب
تكتب ايه او لمين مش مهم المهم انك تقول أي حاجة عشان ما تطقش
و بجد ما فيش في دماغي موضوع كامل اكتبه بس في اسئلة كتيرة محيراني
1 ) هو الحب عيب ؟؟
2) هوا في حاجة اسمها غلط بين اتنين بيحبوا ( ما لم يتعدوا حدود الدين طبعا) ؟؟
3) هي البلد دي بايظة ولا انا اللي بيتهايئلي ؟؟
يا ريت اللي يعرف أي اجابة يقولي

نسيبنا بقي من مصايبي و مشاكلي اكيد هتتحل كلها في يوم علي الاقل بموتي
انما بقي مشاكل البلد دي اللي ما بتنتهيش هنعمل فيها ايه ؟؟
بجد نفسي اجيب رشاش واموت 3/4 الحكومة ان ما كانتش الحكومة كلها
خلاص الحكومة مش لاقية غير المدرسين الغلابة ( اه غلابة انا بتكلم عن المدرسين الغلابة اللي لا بيدوا دروس خصوصية ولا بيعقدوا الطلبة في حياتهم ومظلومين جوا المدرسة وبراها اللي كلنا انا وانت و كل التلامذة بيحبوهم الاخصائي الاجتماعي و امين المكتبة الناس اللي لا بيدوا دروس خصوصية ولا بيستفيدوا من التعليم غير متعتهم في وجودهم مع الشباب و الاطفال و التلاميذ متعة انا نفسي لحد النهاردة مش فاهمها بس كل اللي متاكد منه انها متعة تستحق التقدير و الاحترام ) وقبل ما حد قيكوا يضرب ويقولي اخلص وقول الحكومة جت عليهم في ايه اقول انا لوحدي
قال ايه يا سيدي ( وما سيدك الا انا :D ) الحكومة عايزاه تعمل كادر جديد من المدرسين بمستويات اعلي و مرتبات اكبر قلنا كويس دا شئ عظيم و اتخمينا في الحكومة كالعادة انها ساذجة و هتصرف علينا (قال يعني بتصرف علينا من جيب ابوها ) المهم الحكومة كالعادة طلعت حكومة صايعة و ماشية بمبدأ من( دقنه وافتله )
بالعربي للي مش فاهمين يعني خد من الفلوس اللي بتديها للشعب و اعملهم بيها شوية حاجات تفرحهم دا علي اساس ان الشعب عبيط و مش واخد باله
بس يا خسارة يا ريس الشعب بقي فقران ما حيلتوش حاجة ناخدها منه تاني نعمل ايه ؟؟
ووقعت الحكومة في حيص بيص ( ضربت لخمة يعني )
لحد ما جيه الاستاذ العقبري ربنا يحميه لشبابه ( اوعي حد يقول امين والله ادبحه )
الدكتور /احمد درويش ( مدير التنمية الادارية ) قالوا يا ريس
قالوا ايه يا حماده قالوا دا انتا بتديهم كل سنة 200 يوم مكافأة بحالهم بتاعت الامتحانات مش كتير عليهم
وكمان هما مش محتاجينهم في حاجة واكلين شاربين نايمين مسروقين جوا البلد دا انت مغرقهم بخيرك يا ريس
وكمان هتعملهم كادر جديد هما هيطمعوا و لا ايه
فرح الريس و قالوا برافو يا حماده
وطلع القرار اللي نزل علي مدرسين مصر اجمعين كالصاعقة بالغاء مكافئة الامتحانات
طب والنبي ازاي المدرس يبقي ليه نفس يدرس للطلبة وانتوا بدل ما تدولوا مكافئات بتاخدوا المكافئات اللي عنده
وقال ايه عايزين احمد زويل تاني
ادي دقني اهي بمستوي التعليم اللي جي ابقوا قابلوني لو عرفتوا تطلعوا شعبان عبد الرحيم تاني مش احمد زويل

و السلام ختام اعزائي الكرام
وما نجلكوش في مكافئة ملغية


محدثكم المخنوق
يوكـــــــــــــــــــــــــــــــــــــــــــــــا

love doesn't delight in evil , but rejoices with the truth

بكل الحب هنتكلم عن الحب :D
ما تخافوش مش اسامة منير انا يوكا بس تقريبا الحب شاغل كتير من تفكيري
المهم نخش في موضوع النهاردة
ماشي في امان الله في وسط البلد واحد صاحبي كلمني بيقولي ريكو تعالالي ( انا ريكو برضة مش تستغربوا ) المهم في ايه قالي اهو نقعد مع بعض شوية قلت مش مشكلة
المهم روحتله وبنتمشي عادي وهوا بيتكلم فجأة لقاني سكت
بيقولي مالك قلتله بص وانت تعرف
تتخيله كنت باصص علي ايه ؟؟؟؟؟؟؟؟؟؟؟؟؟؟
اربع شباب بسم الله ما شاء الله زي الفل الواحد فيهم لو عطس جنب الهرم الكبير هيعمل فيه ثقوب تحتاج اربع سنين ترميم
واقفيين ومركزين جدااااااااااااااااً
هاااااااا يا شطار حد هيقولي مركزين في ايه
1- موضوع علمي شيق
2-ندوة (ااه ندوة في الشارع حد عنده اعتراض )
3- بوستر فيلم او شريط جديد ( ااه شباب هايفة عادي )
هــــــــــــــا غلب حماركوا ؟؟
ولا واحدة (شايفك ياللي بتقول عليا غلس )
كانوا واقفين بيتفرجوا علي محل لانجيري (ملابس نوم حريمي ;)
و النظرة اللي في عيون كل واحد فيهم بتوصف هوا بتخيل ايه وايه اللي جواه (حد قليل الادب بقي يقولي كانوا بيفكروا في ايه )
( ايه دا في واحد صدق .... ولد ....عيب في بنات قاعدين )
تصدقوا صعبوا عليا و برضة كنت بقول في سري عمـــــــــار يا مصر معقولة شبابنا وصلوا للدرجة دي ؟؟
اللي شادد تركيزه تمثال خشب لانثي
واللي غاظني شاب فاكر نفسه مقطع السمكة وديلها واقف بيضحك عليهم ويقول اقروا الفاتحة علي الرجالة
بس ارتحت نفسياً لما واحد من الاربعة خرج من تركيزه وقاله كلمة سمعتها كتييييير ( جوزوني وحاسبوني ) رغم ان الكلمة بيقولها من حسرته بس غصب عني ضحكت
المهم ما اطولش عليكوا ( قولوا طــــــــــــــــــــــــــــــول )
ايه الحل ؟؟؟؟؟؟؟؟؟؟؟
نسيبهم يتفرجوا علي التماثيل الخشب ويبقي يوم عيد بالنسبة ليهم لما يكونوا في المحل دا بيغيروا للموديلز دي ( فاهمني طبعاً )
ولا نولع فيهم ولا نسيبهم يغلطوا ولا نعمل ايه ؟؟؟؟؟؟؟؟؟
ولا كالعادة نقول للأهالي بالراحة عليهم وما تزودوش في متطلبات الجواز والكلام اللي زهقنا من كتر ما قلناه ( والاهالي بينفضولنا كالعادة)
بصراحة انا شايف ان الحل صعب
بس اللي انا متأكد منه ان الحب ممكن يحل المشاكل دي
( اه الحب وماحدش يضحك ولا يقول عليا مجنون ولا يقول عليا يوكا العاطفي )
نظرة في عين الانسان أو الانسانة اللي بتحبها بتحسسك بنشوة تنسيك اي غريزة جواك
والله والله والله شوفتها مع شباب كتير من اللي بيقولوا عليهم ( مقطعين السمكة وديلها مع اني مش فاهم ايه علاقة السمكة بالموضوع بس ما علينا )
واحد فيهم قاللي تعرف علي قد ما شفت وعملت في الدنيا البنت اللي بحبها ما فكرتش حتي ابص تحت رقبتها
( اكيد مش قصده ما بصش هيا لابسة ايه ) هوا قصده انه مش بصلها كانثي (مش عشان هيا مش جميلة او حاجة ) بس لانه بيحبها بجد فبيحاافظ عليها حتي من نفسه
وصدقوني دوروا علي الحب ( بس مش اي حب ) الحب اللي بجد ومش بقولكوا كده عشان انزل بكرة الاقي كل شاب ماسكلي وردة وعامل كلاسيك ويقولي بدور علي الحب
لا اقصد اللي يقابل فيكوا حب بجد ( حد يحرك المشاعر الحلوة , المشاعر الانسانية ) يمسك فيه باديه وسنانه ورجليه و يخلي صحابه يمسكوا معاه لو ينفع
هلاقي حد ابن ناس كويس هيقولي الاسلام هوالحل ( مع الاحترام لاخوانا ربنا يكفينا شر.... ولا بلاش )
هقولوه انتا لو حبيت بجد هتلاقي نفسك بتتقي ربنا وتراعيه عشان حاجات كتير
عشان يوفقك في حبك و في حياتك
هتلاقي نفسك مش بتبص علي اي بنت تانية مش لانك بقيت معصوم من الخطأ ولا حاجة بس لانك تخاف يحصل كده للبنت اللي بتحبها او حد يبص عليها دا غير انك اصلا مش هتبقي شايف بنات غيرها في الدنيا
هتصلي تدعي ربنا عشان يساعدك ( ببساطة بقي ليك هدف في الحياة )
دا بالنسبة للدين
و الدنيا بقي هتلاقي الشاب اللي بيحب دا بيحاول يبقي احسن حاجة في الدنيا عشان يشرف حبيبته دي
بس برضه البنات عليهم عامل
اتعلموا ازاي تحبوا وتقفوا جنب اللي بتحبوه
مش عيب انك تقفي قصاد اهلك تقوليلهم انا بحب الانسان دا ( لو متاكده انه بيحبك بجد )
وتقفي جنبه لحد ما توصلوا للي انتوا عايزينه
صدقيني هاتفرحي اووووييييييييييييي بيه ومعاه
هتفرحي بيه انك هاتثبتي لاهلك انك كنتي صح واختارتي انسان كويس وبقي حاجة تشرف بمساعدتك
وهتفرحي معاه لانك بتحبيه وبيحبك
ومش هتصدقوني لو قلتلكوا ان الاهل كمان هيفرحوا لما يعرفوا ان بنتهم عرفت تختار وانهم عرفوا يربوا بنت مستقلة تقتدر تعتمد علي نفسها مش مجرد طفلة بتسمع كلامهم (طب لا قدر الله لو توفوا او حصلهم حاجة ميين اللي هيقولك تعملي ايه )
ببساطة حبــــــــــــــــــــــوا هتبقوا احسن بس الحب الحقيقي اللي بجد اللي يخليكوا احسن
الحب مش مجرد كلمة بتتقال الحب دا فيه اصعب واجمل المعاني في الدنيا
مسئولية و مشاعر - تعب و راحة
فيه حاجات لو فضلت اتكلم فيها لبكره مش هاخلص مش عايز اطول عليكوا اكتر من كده ( عارف ماحدش هيقول طول )
ممكن يكون في حلول تانية ( الله اعلم ) ممكن اكون انا في حالة رومانسية
انما انا بقولكوا حل انا جربته ومش هتصدقوا بس اللي كانوا يعرفوا ريكو كويس ويعرفوه دلوقتي هيقولولكوا الحب غير فيا قد ايه
مع اني بحب بسكوتة صغيرة كلها علي بعضها بتاعت اتنين كيلو ونص ( لا مش للدرجة دي بهزر اكيد )
بس بجد البسكوتة دي غيرت كل حاجة فيا يارب كل واحد فيكوا يلاقي اللي تقدر تغيره و تخليه احسن وما الاقيش حد تاني واقف قدام محلات الانجيري دي تاني ( البنات طبعا عادي من حقهم يقفوا )
وانا هابقي انزل افتش بنفسي :D

اسيبكوا بقي عشان كده كفاية وكمان ايديا وجعتني من الكتابة

لسه قاعد فوق الكرسي مستني ( مش عارف مستني ايه بس مستني )


امضاء
يوكا

أعطيتك حباً لا يقبل جدلاً
أعطيتك قلباً اعتبرك رباً
أعطيتك عقلا لا يخشى احداً
أعطيتك ما ليا في الدنيا ...ولا ابغي عوضاً
أكثيرٌ ما اطلب؟؟
لا أطلب منك إلا ....حباً حباً حباً
لا أبحث عن حب الصبيان أو الحانات
ابحث عن حب لا يرضى بالعقبات
أعرف في قلبك هذا الحب ....يناضل كي لا يدفن كالاموات
فأحبيني او ابتعدي ....فقلبي يأبى الموت في سبات



إلي صاحبة القلب المناضل :
الحب مكانه القلوب وليس القبور
فرجاءً لا تقتلي حباً قد جاء الدنيا علي يديكي
ولا تنكري قلباً أبحر مذ ولد بحثاً عن عينيكي


امضاء

قلب رافض للموت

ليــــــــــــــــــــــــــــــــــــــــــــــــــه ؟؟؟

ليه ما كنتش انا ؟؟ ( استغفر الله العظيم ) بس بجد ليه الكويسين يموتوا واللي زيي يعيش
علي الاقل موتي هايريح الناس

الله يرحمك يا شادي

في الجنة ان شاء الله يا صاحبي .......كان نفسي ابقى معاك بس الله أعلم هبقى فين
رغم اني مش مصدق لحد دلوقتي بس مش لاقي حاجة اقولها غير .................
سامحني لو في يوم اتنرفزت عليك او زعلتك انت عارفني وعارف اني مهما بزعل
او بزعق قلبي طيب ........مش هاقولك غير سامحني .........


امضاء
حزين مذهول

عمـــــــــــــــــــــــــــــــــار يا مصر

بعد مشروع كمبيوتر لكل مواطن
تتفضل حكومة جمهورية مصر العربية بتقديم مشروع
بقرة لكل مواطن

والله مش بهرج يا جماعة انا بتكلم بجد دا الحل الوحيد لمشكلة اللبن
اصل هنعمل ايه حتي اللبن ما بقاش مضمون مش عارف اضحك ولا اعيط بس بجد افتكرت كان في نكتة
قديمة بيقول للريس الشعب مش لاقي عيش يا ريس قالوا خليهم ياكلوا جاتوه
طب دبرنا المرة دي يا ريس الشعب مش لاقي لبن نشرب ايه ؟؟؟؟؟؟؟؟؟؟
هتقولي نشرب بيبسي
النهاردة بجد اتحرق دمي وانا بتفرج علي برنامج العاشرة مساءً
بسم الله ما شاء الله جايبين 3 اساتذة محترمين ( دا اللي انا كنت فاكره قبل ما اكمل البرنامج ) المهم والحمد لله
ما حدش فيهم قال حاجة تبل الريق وتقول للمواطن البسيط يعمل ايه في مشكلة اللبن ؟؟
واحد محترم ( لسه فاكره محترم طيب انا اوي و بصدق المنظر ) المهم قال ايه الشخص دا قال بدل ما تشرب
اولادك مرتين لبن كفاية مرة واحدة وهاتلهم لبن معلب ( عايز اقولوه لفظ اعتراض شعبي بس عييب انا في مدونة محترمة ) فاكر ان المواطن المطحون بيشرب اولاده مرتين لبن في اليوم ما يعرفش ان هيا كباية واحدة الصبح وبتلف علي البيت كله كل واحد شفطة
المهم قلت بلاها الراجل دا ( خلاص عرفت انه عبييط مش محترم )
خلينا مع الاتنيين التانين يمكن حد فيهم يقول حاجة مفيدة وبعد طول انتظار نطق مسئول وزارة الصحة
قلت بقي هيجيب الديب من ديلوه وياريته ما نطق قال ايه اللبن سليم الحمد لله وما فيهوش حاجة والحياة زي الفل
وانه لسه بيشتري لبن الحمد لله واتطمننا علي صحة سعادته وانه لسه ما اتفطمش وقلب الموضوع لدعاية للست حرمه و مدى براعتها في عمايل الزبادي بس نسي حاجة مهمة انه يقول رقم موبايل المدام اهو نبقي ننفعها ونشتري منها الزبادي المضمون المهم ما بلش ريقي شوية غير السيد التالت اللي يعني ( نص محترم )
قال يا جماعة لازم نلاقي طريقة نقول للمواطن عليها يكتشف بيها اللبن المغشوش
قلت الحمد لله هنلاقي حل بس بما اني طيب زيادة عن اللزوم طلعت تسرعت كالعادة لانه لما اتسال طب ايه الطريقة دي ؟؟
فرك مخه بذكاء العلماء النوابغ وشد في شعره كالعباقرة وقال بصوت جهوووووووور
مش عارف
اسم النبي صاينك وحارسك استفدنا ايه كده بقي ان شاء الله
قلت المشكلة اللي احنا عارفيينها ومش عارف الحل ؟؟؟
زغرط يا شعب و هيص يا مواطن الحكومة هتخليك تشرب لبن معلب و معقم
مش علي حسابهم طبعاً ( انت عبيط ولا ايه يا عم هوا في حاجة علي حساب الحكومة ) علي حسابك طبعا و معلش حاول تتنازل عن كباية اللبن التانيه
واللي بيشرب لبن مرة واحدة دا ابن 60X70 مش لازم يشرب اصلاً
وبالنسبة للاطفال مش شرط بتفطموا باللبن مالها مية الفول كويسة وزي الفل اما بالنسبة للمقتدرين
فالحكومة تقدم احد الحلين
1) بقرة او جاموسة لكل مواطن ( زي ما انت تحب شوفت الحرية )
2) تجيب لبن معلب ( وانت حاطط جزمة في بقك ) و تنفع شركات اللبن اللي الريس او ابنه ( ربنا يخليه لينا ) هايشارك فييها قريب ان ما كانش مشارك فيها اصلاً ( لسه ما اعرفش الموضوع دا بس هاطقس واقولكوا )
وربنا يخليلنا الريس وشركات الالبان المعلبة المضمونة ومية القول المتينة اللي هنفطم عليها الغلابة بعد كده
ويجعله عامر

انا عن نفسي هاستغني عن اللبن واشرب ميرندا ( خلاص بقي عدينا الفقر ) او فودكا ( اهو اعمل دماغ )
الصورة دي اقل رد علي اللي بيحصل فيينا حتي اللبن
امضاء
ريكو باشا

ايه اللي هالة سرحان بتعمله دا يا جماعة !!!!!!!!!!!!!!!!!!!!!!!!!!!
هيا بتهرج ولا ايه هيا كده بتخدع مين ؟؟ بتخدعنا ولا بتخدع مين بالظبط
كان ممكن تعمل البرنامج و توضح وجهة نظرها من غير ما تجيب بنات و تعمل افلام و حوارات
هيا كده ضيعت مصداقية برنامجها
وشوف البجاحة يا اخي ........ كانت فرحانة اوي بالبرنامج وانها الوحيدة اللي هتجيب داعرات وتطلعهم في البرنامج قال يعني دي حاجة تفرح !!!!! تقريبا كانت عايزة تاخد لقب مقنعة الداعرات الاولي في مصر
بس معلش سؤال صغير كده هيا مدي اقناعها ليهم قد ايه ؟؟؟؟؟؟؟؟؟؟؟ يعني لحد الظهور علي الهوا بس ولا اكتر شوية ;)
يا ريت بعد كده يا مدام , يا دكتورة هالة لما تحبي تعملي برنامج ما تضحكيش علينا وتجيبي الحقيقة ومش عيب انك ما قدرتيش تلاقي داعرات حقيقيلت يظهروا في البرنامج
مش لاننا بلد خالي من الدعارة لا سمح الله ........... بس لان مش معقول واحدة هتتطلع تقول علي نفسها كده حتي لو هيا فعلاً كده
احنا رغم مظاهر الامركة مازلنا مجتمع شرقي يا دكتورة

حنين للقبر
. أشعر بالوحدة.... تقتلني وأحس الموت....يحوطني
. عمري بالكامل أعوام واليأس يخيم في وطنـي
. جربت الحب...ولم انجح قلبي المفطور يأنبنــي
. جربت الضحك...ولم أفلح و الهم الدائم صادقنـي
. لم أنجح.... إلا في الفشل خطأ من خطأ يأخذنــي
. عقلي امتنع عن العمل أبحث عن شئٍ يسعدنـي
لكني... لا أريد حباً....لا أريد فرحاً.....جل ما أريد....ملكٌ للقبر يسلمنـي





لم اندم علي فراقك ولكن الندم كل الندم.............علي لقيا كي